Zanter dem Schouljoer 2024/2025 leeft de Projet Wat sees du?, en innovative Bildungsprojet, deen d’Kanner aus dem Cycle 4 op eng spannend Entdeckungsrees an d’Welt vum Debattéieren mathëlt.

An dräi Interventiounen an der Klass ginn d’Schülerinnen an d’Schüler op spilleresch a pedagogesch Aart a Weis un d’Technike vum fairen Diskutéieren erugeféiert. Si léieren:

• wéi si hir eege Meenung kloer a selbstbewosst formuléieren,
• wéi een Argumenter opbaut a se richteg gebraucht,
• wéi een an engem Grupp fair a respektvoll domat ëmgeet, datt et ënnerschiddlech Meenunge gëtt.

Duerch déi proposéiert Aktivitéiten entwéckelen d’Kanner net nëmmen hir Sproochkompetenz, mee och hiert kritescht Denken, Empathie an Teamgeescht – Fäegkeeten, déi si hiert ganzt Liewe begleede wäerten.

D’Resultater, déi fäerdeg Klasseproduktiounen – also déi richteg Debatten – kënnt dir op dëser Säit lauschteren. Lauschtert eran a loosst iech iwwerzeegen!

Wéi eng Säit huet iech am meeschte beandrockt?